ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑐᓴᕋᑦᓭᑦ: ᑲᑎᒪᑦᓯᖃᒻᒥᐅᓚᐅᕐᑐᖅ ᑯᐯᑉ ᐊᖓᔪᕐᖄᖓᓂᒃ ᓄᓇᕕᒻᒥ

ᑰᑦᔪᐊᖅ, ᑯᐯᒃ, ᓅᕕᒻᐱᕆ 1, 2017 – ᐊᒃᑑᐸ 26-ᒥ ᐊᒻᒪᓗ 27-ᒥ, ᑯᐯᑉ ᐊᖓᔪᕐᖄᖓ ᕕᓕᑉ ᑯᐃᔮ ᓄᓇᕕᓕᐊᕐᓯᒪᓚᐅᕐᑐᖅ ᑯᐯᑉ ᑕᕐᕋᖓᓂ ᐊᕐᕕᑕᕐᓱᓂ. ᒪᓕᑦᑕᐅᓚᐅᕐᑐᖅ ᑐᕐᖃᑕᕐᕕᖁᑎᒥᓄᑦ ᑲᒪᒋᔭᓕᒻᒧᑦ ᓄᓇᖃᕐᖄᑐᕕᓂᓕᕆᓂᕐᓂᒃ, ᔨᐊᕗᔨ ᑭᐊᓕᒧᑦ, ᑐᕐᖃᑕᕐᕕᖁᑎᒥᓄᑦ ᓇᐹᕐᑐᓕᕆᓂᕐᓄᑦ, ᐆᒪᔪᓕᕆᓂᕐᓄᑦ ᐊᒻᒪᓗ ᒥᕐᖑᐃᓯᕐᕕᓕᕆᓂᕐᓄᑦ ᐊᒻᒪᓗ ᑐᕐᖃᑕᕐᕕᖁᑎᒥᓄᑦ ᑲᒪᒋᔭᓕᒻᒧᑦ ᐊᐱᑎᐱ-ᑌᒥᔅᑲᒥᖕᒥ ᓄᓇᓕᓕᒫᓂ ᐊᒻᒪᓗ Nord-du-Québec ᓄᓇᓕᓕᒫᓂ, ᓘᒃ ᐸᓛᓐᓯᐊᑦᒧᑦ, ᐊᒻᒪᓗ ᑯᐯᒃ ᑲᕙᒪᖓᑕ ᐅᖃᕐᕕᒪᕆᖓᓂ ᐅᖓᕙᐅᑉ ᑭᒡᒐᑐᕐᑎᖓᓂᒃ, ᔮᓐ ᐳᑦᓴᒥᒃ.

ᓄᓇᕕᒻᒦᓱᓂ, ᐊᖓᔪᕐᖄᖅ ᑲᑎᓯᓚᐅᕐᑐᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ (ᑫᐋᔩ) ᑐᑭᒧᐊᑦᑎᓯᔨᖓᓂᒃ, ᔨᐊᓂᕙ ᒪᓂᒻᒥᒃ, ᑫᐋᔩᑉ ᑲᔪᓯᑎᑦᓯᔨᖓᓂᒃ, ᒣᑯ ᑯᐊᑕᒥᒃ, ᓄᓇᓖᑦ ᑲᕙᒫᐱᖓᑕ ᓯᕗᓕᕐᑎᖓᓂᒃ ᐊᒻᒪᓗ ᑫᐋᔩᑉ ᐳᕐᑐᓂᕐᓴᖏᓐᓄᑦ ᐃᓚᐅᔪᒥᒃ, ᑐᓄ ᓇᐹᕐᑐᒥᒃ, ᐊᒻᒪᓗ ᐊᖓᔪᕐᖄᖓᓂᒃ ᓄᓇᕕᒻᒥ ᐃᓄᑐᙯᑦ ᑲᑎᒪᔨᖏᑦᑕ, ᐹᐱ ᓯᓅᐹᓪᒥᒃ. ᑲᑎᒪᓂᖓ ᐊᑑᑎᖃᓚᐅᕐᑐᖅ ᐊᖓᔪᕐᖄᖅ ᖃᓄᐃᓕᖓᓕᕐᒪᖔᑕ ᐅᓪᓗᒥ ᑐᓴᕐᑎᑕᐅᑎᓪᓗᒍ ᐊᒥᓱᐃᓂᒃ ᐱᒻᒪᕆᓐᓂᒃ ᑫᐋᔩᑉ ᐱᓇᓱᐊᕐᑕᖏᓐᓂᒃ, ᐃᓚᐅᑎᓪᓗᒋᑦ ᐃᕐᖃᑐᐃᕕᓕᕆᓃᑦ ᐊᒻᒪᓗ ᐃᓄᐃᑦ ᑭᓇᓕᒫᒃᑯᑦ ᐊᑦᑕᓀᑦᑐᒦᑦᑎᑕᐅᓂᖏᓐᓂᒃ, ᖃᕆᑕᐅᔭᒃᑰᑎᑦᓯᐅᑎᓂᒃ, ᐃᑯᒪᐅᑏᑦ ᐊᑭᖏᓐᓂᒃ, ᓂᐅᕕᐊᑦᓭᑦ ᐊᑭᑐᓂᖏᓐᓂᒃ, ᐊᒻᒪᓗ ᑯᐯᑉ ᑲᕙᒪᖓᑕ ᓄᑖᒍᑎᓪᓗᒋᑦ ᖃᓄᐃᓕᒋᐊᕐᓂᓄᑦ ᐸᕐᓀᓯᒪᐅᑎᖓᓂᒃ ᐊᒻᒪᓗ ᓄᓇᓕᑐᖃᑦᓴᔦᑦ ᐊᒻᒪᓗ ᐃᓄᐃᑦ ᐃᓗᒡᒍᓯᖏᑦᑕ ᐱᕙᓪᓕᐊᓂᖏᓐᓂᒃ.


ᐊᒻᒪᓗ, ᐹᐱ ᓯᓅᐹᓪ ᐅᖃᐅᓯᖃᓚᐅᕐᓱᓂ ᐅᖃᐅᓯᑎᒍᑦ ᐱᔭᕐᓃᑑᒍᑕᐅᕙᑦᑐᓂᒃ ᑐᑭᓯᒪᐅᑎᓂᑎᒍᑦ ᑯᐯᑉ ᑲᕙᒪᖓᓄᑦ ᐊᒻᒪᓗ ᐃᓄᑐᙯᑦ, ᐊᒻᒪᓗ ᕿᓄᒍᑎᖃᕐᓱᓂ ᑮᓇᐅᔭᖃᕐᑎᑕᐅᖁᑦᓱᒋᑦ ᐱᓇᓱᐊᕐᑎᑕᐅᓗᑎᒃ ᑲᔪᓯᑎᑦᓯᔩᑦ ᐃᓘᓐᓀᓂ ᓄᓇᓕᓐᓂ ᐃᑲᔪᕐᓯᔨᐅᓚᖓᔪᑦ ᑌᒫᒃ ᑐᑭᓯᒪᑎᑕᐅᑦᓯᐊᕆᐊᖃᕐᓂᖏᑦ ᐃᓄᑐᙯᑦ ᐱᑦᔪᑎᒋᓗᒋᑦ.


"ᑖᑦᓱᒥᖓ ᐱᕕᖃᕐᑎᑕᐅᑦᓯᐊᓚᐅᕋᑦᑕ ᑐᑭᓯᑎᑦᓯᒋᐊᕐᓱᑕ ᐱᔭᕐᓃᓘᕐᐸᓂᖏᓐᓂᒃ ᓄᓇᕕᒻᒥᐅᑦ ᐊᑦᔨᒌᖕᖏᑐᑎᒍᑦ ᐅᓪᓗᑕᒫᑦ ᐃᓅᓯᕐᒥᓂᒃ ᐃᑲᔪᕐᓯᔭᐅᓯᒪᕙᒋᐊᖃᕐᓱᑎᒃ. ᐊᒻᒪᓗ ᓇᑯᕐᒦᓱᑕ ᐊᖓᔪᕐᖄᒥᒃ ᐱᓇᓱᐊᖃᑎᒌᑦᑎᓯᑦᓯᐊᐸᒻᒪᑦ ᑲᕙᒪᒃᑯᓂᒃ ᐊᒻᒪᓗ ᑫᐋᔩᒥᒃ," ᑌᒫᒃ ᐅᖃᓚᐅᕐᑐᖅ ᔨᐊᓂᕙ ᒪᓂᒃ. "ᑲᑎᒪᓂᕆᓚᐅᕐᑕᕗᑦ ᐱᕙᓪᓕᖁᑎᑦᓯᐊᒍᓚᐅᕐᑐᖅ. ᑐᑭᓯᑎᑦᓯᓯᐊᓚᐅᕐᑐᒍᑦ ᐱᓇᓱᐊᕈᑎᖃᕐᓗᑕ

ᐊᕐᓕᐊᖏᓐᓇᕈᑎᖃᕐᓂᐊᕋᑦᑕ ᐊᒻᒪᓗ ᑭᒡᒐᑐᕐᑎᒋᔭᐅᓗᑕ ᐃᓄᓐᓂᒃ ᑯᐯᑉ ᑲᕙᒪᖓᓄᑦ ᑲᔪᓯᑎᑦᓯᒋᐊᕐᓂᑎᓄᑦ ᐱᐅᓂᕐᓴᓂᒃ ᐃᓅᓯᖃᑦᓯᐊᖁᓪᓗᒋᑦ ᐃᓄᖁᑎᕗᑦ."

 

-30-


ᑐᑭᓯᒋᐊᕐᕕᓴᖅ:

ᔮᓐ-ᕕᓕᑉ ᑐᐳᐊ
ᑐᓴᐅᒪᐅᑎᓕᕆᓂᕐᓂᒃ ᑲᔪᓯᑎᑦᓯᔨ
ᑲᑎᕕᒃ ᓄᓇᓕᓕᒫᑦ ᑲᕙᒪᖓ
ᐅᖄᒍᑎᖓ 819-964-2961 ext. 2219
| www.krg.ca

 

ᑲᑎᕕᒃ ᓄᓇᓕᓕᒫᑦ ᑲᕙᒪᖓ 1978-ᒥ ᑎᒥᖕᖑᑎᑕᐅᓯᒪᔪᖅ ᐃᓄᓐᓄᐊᖓᔪᖅ ᐃᓕᒃᑰᑎᕐᑎᓯᒐᓂ, ᐊᑖᒎᕐᓱᓂ ᔦᒥᔅ ᐯ ᐊᒻᒪᓗ ᑯᐯᑉ ᑕᕐᕋᖓᑕ ᐊᖏᖃᑎᒌᒍᑎᐅᑉ, ᑖᓐᓇ ᑎᒥ ᐊᖓᔪᕐᖃᐅᕕᖃᕐᐳᖅ ᑯᐯᑉ ᑕᕐᕋᖓᑕ ᓄᓇᓕᒫᑲᓵᖓᓂᒃ 55 ᖁᓛᓂ ᐱᑦᔪᑎᒋᓗᒋᑦ ᓄᓇᓖᑦ ᑲᒪᒋᔭᖃᕐᓂᖏᑦ, ᐃᖏᕐᕋᐅᑎᓕᕆᓂᖅ, ᐊᕙᑎ, ᐳᓖᓯᖃᕐᓂᖅ, ᐱᓇᓱᒐᑦᓴᓕᕆᓂᖅ, ᐱᓇᓱᒋᐅᕐᓴᑎᑦᓯᓂᖅ, ᓂᕐᓯᑕᐅᑦᑕᑐᓕᕆᓂᖅ, ᐯᕆᑦᓯᕕᖃᕐᑎᓯᓂᖅ, ᓄᑕᐅᓪᓕᕈᓐᓇᑐᓕᕆᓂᖅ, ᓄᓇᐅᑉ ᐊᑐᕐᑕᐅᓂᖓᓄᑦ ᐸᕐᓀᒍᑎᓕᐅᕐᓂᖅ, ᐃᓄᓐᓂᒃ ᐊᑦᑕᓀᑦᑐᒦᑦᑎᓯᓂᖅ ᐊᒻᒪᓗ ᐱᕙᓪᓕᐊᑎᑦᓯᓂᖅ ᒪᑭᑕᒐᓱᐊᕈᑎᓂᒃ.