ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑐᓴᕋᑦᓭᑦ: ᐅᒃᑯᐃᑕᐅᓂᖓ ᑐᕐᓱᔪᖅ ᒥᕐᖑᐃᓯᕐᕕᐅᑉ

ᑰᑦᔪᐊᖅ, ᑯᐯᒃ, ᓅᕕᒻᐱᕆ 1, 2017 – ᑐᕐᓱᔪᖅ ᒥᕐᖑᐃᓯᕐᕕᒃ ᐅᒃᑯᐃᑕᐅᓚᐅᔫᖅ ᐊᒃᑑᐸ 27-ᒥ ᒥᕐᖑᐃᓯᕐᕕᐅᑉ ᑕᑯᔭᕐᑐᑐᓂᒃ ᑐ    ᖕᖓᓱᑦᑎᓯᕕᖓᓂ ᐅᒥᐅᔭᒥ. ᑖᕙᓃᓚᐅᔫᑦ ᑐᑭᒧᐊᑦᑎᓯᔨᖓ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ (ᑫᐋᔩ), ᔨᐊᓂᕙ ᒪᓂᒃ, ᑯᐯᑉ ᐊᖓᔪᕐᖄᖓ ᕕᓕᑉ ᑯᐃᔮ, ᑐᕐᖃᑕᕐᕕᖓ ᓇᐹᕐᑐᓕᕆᓂᕐᓄᑦ ᐊᒻᒪᓗ ᒥᕐᖑᐃᓯᕐᕕᓕᕆᓂᕐᓄᑦ ᐊᒻᒪᓗ ᑐᕐᖃᑕᕐᕕᒃ ᑲᒪᒋᔭᓕᒃ ᐊᐱᑐᐱ-ᑌᒥᐊᔅᑲᒥᖕ ᓄᓇᓕᓕᒫᖓᓂ ᐊᒻᒪᓗ Nord-du-Québec ᓄᓇᓕᓕᒫᖓᓂ, ᓘᒃ ᐸᓛᓐᓯᐊᑦ, ᑐᕐᖃᑕᕐᕕᒃ ᑲᒪᒋᔭᓕᒃ ᓄᓇᖃᕐᖄᑐᕕᓂᓕᕆᓂᕐᓂᒃ, ᔨᐊᕗᔨ ᑭᐊᓕ, ᐅᖓᕙᒥ ᑯᐯᒃ ᐅᖃᕐᕕᒪᕆᖓᓂᒃ ᑭᒡᒐᑐᕐᑎ, ᔮᓐ ᐳᑦᓴ, ᐊᒻᒪᓗ ᐅᒥᐅᔭᐅᑉ ᑲᕙᒫᐱᖓᑕ ᓯᕗᓕᕐᑎᖓ, ᔮᒃ ᓂᕕᐊᕐᓯ. ᑐᕐᓱᔪᖅ ᓄᓇᕕᒻᒥ ᓯᑕᒣᒋᔭᐅᓕᕐᑐᑦ ᑯᐯᒻᒥ ᒥᕐᖑᐃᓯᕐᕕᐅᖃᑕᐅᓕᕐᓱᓂ. ᓄᓇᖁᑎᖓ ᐃᒣᓪᓗᐊᑐᓂᒃ ᐊᖏᓂᓕᒃ 26,107 km2, ᑯᐯᓕᒫᒥ ᒥᕐᖑᐃᓯᕐᕕᓂᑦ ᐊᖏᓂᕐᐸᐅᓱᓂ.

"ᑖᓐᓇ ᐅᒃᑯᐃᓯᓂᖅ ᐊᑑᑎᓚᕿᔪᖅ ᐱᓇᓱᐊᖃᑎᒌᑦᓯᐊᓂᖏᓐᓄᑦ ᓄᓇᓕᓐᓂ ᐃᓄᐃᑦ ᐊᒻᒪᓗ ᑯᔩᑦ ᐊᓪᓓᑦ ᑭᒡᒐᑐᕐᑎᖏᑦᑕ, ᐊᒻᒪᓗ ᑫᐋᔩᑉ ᐊᒻᒪᓗ ᑯᐯᑉ ᑲᕙᒪᖓᑕ," ᓚᓚᐅᕐᑐᖅ ᔨᐊᓂᕙ. "ᐅᐱᒪᔪᒻᒪᕆᐅᓕᕐᑐᒍᑦ ᐱᓚᕿᑦᓯᐊᒥᒐᑦᑕ. ᓄᓇᑦᑎᓂᒃ ᓱᒃᑯᑕᐅᑦᑌᓕᑎᑦᓯᓂᖅ ᐊᒻᒪᓗ ᐱᓇᓱᒐᑦᓴᓂᒃ ᓄᐃᑎᕆᓂᖅ ᑭᖑᕚᕆᓛᕐᑕᕗᑦ ᐱᑦᔪᑎᒋᓗᒋᑦ ᐆᒻᒪᑎᖓᓃᖏᓐᓇᐳᑦ ᑫᐋᔩᑉ ᐱᒋᐊᓚᖓᔭᖏᑦᑕ."


ᑐᕐᓱᔪᖅ ᒥᕐᖑᐃᓯᕐᕕᒃ ᐅᒥᐅᔭᐅᑉ ᓴᓂᐊᓃᑦᑐᖅ, ᐃᓄᐃᑦ ᓄᓇᓕᖓᑕ ᐃᓄᓕᐅᑉ 450 ᓴᓂᐊᓃᑦᑐᓂᒃ ᓄᓇᓕᖕᖑᑎᑕᐅᓯᒪᔫᑉ 1986-ᒥ. ᒥᕐᖑᐃᓯᕐᕕᒃ ᓇᓗᓀᒃᑯᑕᖃᕐᑎᑕᐅᔪᖅ ᑕᓯᐅᔭᕐᔪᐊᑉ ᐃᓐᓇᓕᖏᓐᓂᒃ, ᒪᕐᕈᐃᓗ ᐊᖏᔪᒻᒪᕇᒃ ᑕᓰᒃ ᐊᒻᒪᓗ ᐸᑎᕐᑑᖅ. ᐅᖑᒪᔭᐅᔪᖅ ᓄᓇ ᓇᔪᒐᒋᔭᐅᒻᒥᔪᖅ ᓵᒪᓄᑦ, ᑕᕆᐅᒍᖕᖏᑐᒦᓲᓄᑦ ᓇᑦᓯᓄᑦ ᐊᒻᒪᓗ ᕿᓚᓗᒐᕐᓄᑦ. ᒥᕐᖑᐃᓯᕐᕕᒥ ᓇᔪᕐᑕᐅᖃᑦᑕᑐᕕᓃᑦ 3000 ᐊᕐᕌᒍᐃᑦ ᓈᓕᕐᑎᓗᒋᑦ ᖃᐅᔨᔭᐅᓯᒪᔪᑦ, ᐊᒻᒪᓗ ᐃᓄᐃᑦ ᐊᓪᓓᓗ ᑯᔩᑦ ᓂᐅᕐᕈᓯᒋᐊᕐᑐᓯᒪᕕᕕᓂᖏᑦ.


ᒥᕐᖑᐃᓯᕐᕕᒃ ᓄᐃᑕᐅᓯᒪᔪᖅ ᐊᕐᕌᒍᓂ ᐊᒥᓱᓂ ᐱᓇᓱᐊᕈᑕᐅᑦᓱᓂ ᑫᐋᔩᒧᑦ. 2008-ᒥ ᐊᒻᒪᓗ 2009-ᒥᒃ, ᑯᐯᒃ ᑲᕙᒪᖓ ᐊᒻᒪᓗ ᑲᑎᕕᐅᑉ ᐊᕙᑎᐅᑉ ᐱᐅᓂᖓᓄᑦ ᑐᑭᑖᕐᑐᐃᔨᖏᑦ ᑲᑐᑦᔨᓱᑎᒃ ᑲᔪᓯᑎᑦᓯᓂᖃᕐᓯᒪᔪᑦ ᐃᓄᓐᓂᒃ ᑭᓪᓕᓯᓂᐊᕐᓂᒥᒃ ᓄᓇᓕᓐᓂ ᖃᓂᑕᓕᓐᓂ ᒥᕐᖑᐃᓯᕐᕕᐅᑉ ᓄᑕᐅᓂᖓᓄᑦ. ᐊᒻᒪᓗ ᐃᓄᑐᙯᑦ ᐅᒥᐅᔭᒥᐅᑦ, ᑰᑦᔪᐊᕌᐱᒻᒥᐅᑦ, ᕗᐊᑉᐸᑰᔅᑐᐃᒥᐅᑦ ᐊᒻᒪᓗ ᐃᓄᑦᔪᐊᒥᐅᑦ ᑐᑭᓯᓂᐊᕐᑕᐅᑎᓪᓗᒋᑦ. ᒪᑭᕝᕕᒃ ᑯᐊᐳᔦᓴᒃᑯᑦ, ᐊᓪᓓᑦ ᑯᔩᑦ ᐊᖓᔪᕐᖄᖏᑦ, Ministère des Forêts, de la Faune et des Parcs (ᓇᐹᕐᑐᓄᑦ, ᐆᒪᔪᓄᑦ ᐊᒻᒪᓗ ᒥᕐᖑᐃᓯᕐᕕᓄᑦ) ᐊᒻᒪᓗ ᐊᓯᖏᑦ ᐱᓇᓱᐊᖃᑕᐅᔪᑦ ᒪᓂᔨᓯᒪᖃᑦᑕᓚᐅᕐᓯᒪᔪᑦ ᓴᐳᑦᔨᓂᕐᒥᓂᒃ ᓄᐃᑕᐅᒐᓱᐊᕐᓂᖓᓂ.

 

ᑐᕐᓱᔪᖅ ᒥᕐᖑᐃᓯᕐᕕᐅᑉ ᓄᐃᑕᐅᓂᖓᓄᑦ ᐱᓇᓱᒐᖅ ᑲᔪᓯᑎᑕᐅᓯᒪᔪᖅ ᒪᓕᑦᓱᒍ ᐊᖏᖃᑎᖃᕈᑎᒃ ᐱᑦᔪᑎᒋᑦᓱᒋᑦ ᐃᓗᐃᒃᑲᓂᒃ ᑮᓇᐅᔭᖃᕐᑎᑕᐅᓂᖓ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ (ᓯᕗᓂᕐᒧᑦ ᐊᖏᖃᑎᒌᒍᑎᒃ) ᐊᑎᓕᐅᕐᕕᐅᓯᒪᑦᓱᓂ 2004-ᒥ ᐃᓗᐃᒃᑲᖑᕐᑎᑕᐅᓂᖏᓐᓄᑦ ᑯᐯᒻᒥ ᑲᕙᒪᒃᑯᑦ ᑲᒪᒋᔭᖃᕆᐊᖃᕈᑎᖏᑦ ᑲᔪᓯᑎᑕᐅᕙᑦᑐᑦ ᑫᐋᔩᒧᑦ. ᓯᕗᓂᕐᒧᑦ ᐊᖏᖃᑎᒌᒍᑎᐅᑉ ᐊᑖᓂ, ᑫᐋᔩ ᑎᓕᔭᐅᓯᒪᒻᒥᔪᖅ ᓄᓇᕕᒻᒥ ᒥᕐᖑᐃᓯᕐᕕᓂᒃ ᑲᒪᒋᔭᖃᓚᖓᑎᓪᓗᒍ ᐃᑲᔪᕐᑕᐅᓗᓂ ᑯᐯᑉ ᑲᕙᒪᖓᓄᑦ.

 

-30-

 

ᑐᑭᓯᒋᐊᕐᕕᓴᖅ:

ᔮᓐ-ᕕᓕᑉ ᑐᐳᐊ
ᑐᓴᐅᒪᐅᑎᓕᕆᓂᕐᓂᒃ ᑲᔪᓯᑎᑦᓯᔨ
ᑲᑎᕕᒃ ᓄᓇᓕᓕᒫᑦ ᑲᕙᒪᖓ
ᐅᖄᒍᑎᖓ 819-964-2961 ext. 2219
| www.krg.ca

 

ᑲᑎᕕᒃ ᓄᓇᓕᓕᒫᑦ ᑲᕙᒪᖓ 1978-ᒥ ᑎᒥᖕᖑᑎᑕᐅᓯᒪᔪᖅ ᐃᓄᓐᓄᐊᖓᔪᖅ ᐃᓕᒃᑰᑎᕐᑎᓯᒐᓂ, ᐊᑖᒎᕐᓱᓂ ᔦᒥᔅ ᐯ ᐊᒻᒪᓗ ᑯᐯᑉ ᑕᕐᕋᖓᑕ ᐊᖏᖃᑎᒌᒍᑎᐅᑉ, ᑖᓐᓇ ᑎᒥ ᐊᖓᔪᕐᖃᐅᕕᖃᕐᐳᖅ ᑯᐯᑉ ᑕᕐᕋᖓᑕ ᓄᓇᓕᒫᑲᓵᖓᓂᒃ 55 ᖁᓛᓂ ᐱᑦᔪᑎᒋᓗᒋᑦ ᓄᓇᓖᑦ ᑲᒪᒋᔭᖃᕐᓂᖏᑦ, ᐃᖏᕐᕋᐅᑎᓕᕆᓂᖅ, ᐊᕙᑎ, ᐳᓖᓯᖃᕐᓂᖅ, ᐱᓇᓱᒐᑦᓴᓕᕆᓂᖅ, ᐱᓇᓱᒋᐅᕐᓴᑎᑦᓯᓂᖅ, ᓂᕐᓯᑕᐅᑦᑕᑐᓕᕆᓂᖅ, ᐯᕆᑦᓯᕕᖃᕐᑎᓯᓂᖅ, ᓄᑕᐅᓪᓕᕈᓐᓇᑐᓕᕆᓂᖅ, ᓄᓇᐅᑉ ᐊᑐᕐᑕᐅᓂᖓᓄᑦ ᐸᕐᓀᒍᑎᓕᐅᕐᓂᖅ, ᐃᓄᓐᓂᒃ ᐊᑦᑕᓀᑦᑐᒦᑦᑎᓯᓂᖅ ᐊᒻᒪᓗ ᐱᕙᓪᓕᐊᑎᑦᓯᓂᖅ ᒪᑭᑕᒐᓱᐊᕈᑎᓂᒃ.