ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑐᓴᕋᑦᓭᑦ: ᑫᐋᔩᑉ ᑲᔪᓯᖏᓐᓇᓚᖓᔪᓂᒃ ᐱᓇᓱᒐᑦᓴᖃᕐᑎᓯᓂᕐᒧᑦ ᐱᓇᓱᕝᕕᖓᑕ 25-ᒍᒍᑎᖓᓂᒃ ᐊᕐᕌᒍᐃᑦ ᖁᕕᐊᓲᑎᖃᕐᓂᒧᑦ ᑲᑎᒍᑎᖃᕐᓂᖓ ᐃᓚᐅᑎᓪᓗᒍ ᐊᕐᖁᑎᑦᓴᓯᓂᕐᒧᑦ ᑲᑎᒍᑎᖃᕐᓂᖅ

ᑰᑦᔪᐊᖅ, ᑯᐯᒃ, ᓅᕕᒻᐱᕆ 20, 2017 – ᑲᔪᓯᖏᓐᓇᓚᖓᔪᓂᒃ ᐱᓇᓱᒐᑦᓴᖃᕐᑎᓯᓂᕐᒧᑦ ᐱᓇᓱᕝᕕᖓ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ (ᑫᐋᔩ) ᐊᑑᑎᑎᑦᓯᓂᖃᓚᐅᕐᑐᖅ ᐊᕐᖁᑎᑦᓴᓯᓂᕐᒧᑦ ᑲᑎᒍᑎᖃᕐᓂᒥᒃ ᑰᑦᔪᐊᒥ ᖁᕕᐊᓲᑎᐅᑎᓪᓗᒍ 25-ᒍᒍᑎᖓᓂ ᓇᓪᓕᐅᓂᕐᓯᐅᓂᖅ, ᓅᕕᒻᐱᕆ 15-ᒥᑦ 17-ᒧᑦ. ᑕᕝᕙᓃᓚᐅᕐᑐᑦ, 100 ᐅᖓᑖᓅᕐᑐᑦ ᑫᐋᔩᒥᑦ ᐱᓯᒪᔪᑦ, ᐊᑦᔨᒌᖕᖏᑐᓂᑦ ᑎᒥᓂᑦ ᓄᓇᓕᓕᒫᓂ ᐱᓯᒪᔪᑦ, ᐊᒻᒪᓗ ᑕᒪᖏᒃ ᑲᕙᒪᑐᖃᒃᑯᑦ ᐊᒻᒪᓗ ᑯᐯᑉ ᑲᕙᒪᖓ ᑐᓴᕆᐊᕐᓯᒪᓚᐅᕐᑐᑦ ᐊᒻᒪᓗ ᐅᖃᐅᓯᕆᔭᐅᑦᓱᑎᒃ ᓈᒻᒪᖁᐊᕇᑦᑎᓯᓂᕐᓄᑦ, ᓴᓇᓂᕐᓄᑦ, ᐃᓅᖃᑎᒌᓂ ᒪᑭᑕᒐᓱᐊᕈᑎᑦᓴᓄᑦ ᐊᒻᒪᓗ ᐱᓇᓱᑦᑎᓄᑦ.

Jennifer Munick speech

 

 

ᑲᔪᓯᖏᓐᓇᓚᖓᔪᓂᒃ ᐱᓇᓱᒐᑦᓴᖃᕐᑎᓯᓂᕐᒧᑦ ᐱᓇᓱᕝᕕᒃ ᓄᐃᑕᐅᓯᒪᔪᖅ 1992-ᒥ ᑌᑦᓱᒪᓂᓂᓗ ᓄᐃᑎᕆᒍᓐᓇᓯᒪᓕᕐᓱᓂ ᐊᑦᔨᒋᔭᐅᖕᖏᑐᓂᒃ ᐱᔪᓐᓇᓯᐊᕈᑎᓂᒃ ᑲᔪᓯᑎᑦᓱᒋᑦ ᐊᖏᔪᕐᓓᑦ ᑭᒡᒐᑐᕈᑏᑦ ᐊᒻᒪᓗ ᐱᓇᓱᒉᑦ, ᐃᓚᖏᑦ ᑭᒡᒐᑐᕈᑏᑦ ᑲᕙᒪᑐᖃᒃᑯᑦ ᐊᒻᒪᓗ ᑯᐯᑉ ᑲᕙᓚᖓᓂᒃ, ᐃᓚᐅᑎᓪᓗᒋᑦ ᐱᓇᓱᒐᑦᓴᖃᕐᑎᓯᓂᕐᓄᑦ ᐊᒻᒪᓗ ᑮᓇᐅᔭᑎᒍᑦ ᐃᑲᔪᕐᓯᐅᑎᓄᑦ, ᐊᐅᓚᑦᓯᓂᕐᓄᑦ ᐯᕆᑦᓯᕕᓐᓂᒃ, ᐱᓇᓱᑦᑎᓴᖃᕐᓂᒧᑦ ᐊᒻᒪᓗ ᐅᕕᒃᑲᓄᐊᖓᔪᓂᒃ ᐱᓇᓱᒐᕐᓂᒃ.

 

ᑲᑎᒍᑎᖃᕐᓂᖅ ᐱᕕᑦᓴᓯᐊᒍᓚᐅᕐᑐᖅ ᐃᓚᐅᔪᑦ ᐅᖃᐅᓯᖃᕈᓐᓇᑎᓪᓗᒋᑦ ᐊᑦᔨᒌᖕᖏᑐᓂᒃ ᑲᒪᒋᓲᖏᓐᓂᒃ ᐊᒻᒪᓗ ᐊᐅᓚᑦᔭᑕᐅᒋᐊᕐᑐᓴᓂᒃ ᓯᕗᓂᕐᒧᑦ ᐆᑦᑑᑎᒋᓗᒋᑦ ᐃᓱᕐᕆᓯᐅᒥᑎᑦᓯᓂᖅ ᐱᓇᓱᑦᑎᓴᕐᓯᐅᓂᕐᒥᒃ ᐊᒻᒪᓗ ᐅᓄᕐᓰᒋᐊᕐᓂᖅ ᒪᓂᒪᔭᐅᕙᑦᑐᓂᒃ ᐃᓕᓐᓂᐊᑎᑦᓯᓂᕐᓂᒃ ᐊᒻᒪᓗ ᓄᓇᓕᓕᒫᓂ ᐱᓇᓱᑦᑏᑦ ᐱᒋᐊᕈᓐᓇᓯᐊᕐᐸᓂᖏᑦ.

 

"ᑭᒡᒐᑐᕈᑎᕗᑦ ᐊᒻᒪᓗ ᐱᓇᓱᒐᕗᑦ ᐋᕐᕿᓯᒪᓂᓖᑦ ᐊᑦᔨᒋᔭᐅᖕᖏᑐᓂᒃ ᑭᖕᖒᒪᔭᖏᓐᓂᒃ ᐃᓄᐃᑦ ᑕᒡᒐᐅᑎᑦᓯᐅᑕᐅᒍᓐᓇᓱᑎᒃ ᐊᒻᒪᓗ ᑲᔪᓯᑎᑕᐅᕙᑦᓱᑎᒃ ᐃᓄᑦᑎᑑᕐᑐᓄᑦ ᐱᓇᓱᐊᒻᒪᕆᑦᓯᑎᓄᑦ ᑫᐋᔩᑉ ᐱᓇᓱᑦᑎᖏᓐᓄᑦ 14-ᓂ ᓄᓇᓕᓐᓂ," ᓚᓚᐅᕐᑐᖅ ᑫᐋᔩᑉ ᑲᒪᔨᒻᒪᕆᖓ ᔨᐊᓂᕙ ᒪᓂᒃ ᑲᑎᒪᓂᕐᒥ. "ᐱᓇᓱᑦᑎᓴᕐᓯᐅᓂᖅ ᐊᒻᒪᓗ ᐱᓇᓱᑦᑎᓂᒃ ᓄᕐᙯᓇᕐᑎᓯᑦᑌᓕᓂᖅ ᑌᒪᖕᖓᑦ ᓄᓇᕕᒻᒥ ᑎᒥᓄᑦ ᐊᒻᒪᓗ ᐱᓇᓱᑦᑎᖁᑎᓕᓐᓄᑦ ᐱᒐᓱᐊᒻᒪᕆᐅᑕᐅᓲᖅ. ᐅᕙᑦᑎᓄᑦ, ᐋᕐᕿᒍᑎᐅᒍᓐᓇᓲᑦ ᑲᔪᓯᑎᑦᓯᓃᑦ ᐱᕙᓪᓕᐊᒍᑎᑦᓴᖏᓐᓂᒃ ᓄᓇᓕᓐᓂ ᐃᓄᐃᑦ ᐱᓇᓱᑦᑎᓭᑦ, ᐅᓄᕐᓰᒋᐊᕐᓯᒪᓂᖅ ᐱᓇᓱᑦᑏᑦ ᐱᔪᓐᓇᕈᑎᖏᓐᓂᒃ, ᓄᑖᓂᒃ ᖃᓄᕐᑑᖃᑎᙯᓐᓇᕆᐊᖃᕐᐸᑲᑦᑕ ᐱᓇᓱᕝᕕᒋᔭᐅᒍᒥᓇᕋᓱᐊᕐᓂᒧᑦ ᑎᒥᐅᓂᑦᑎᓄᑦ ᐊᒻᒪᓗ ᐱᓇᓱᑦᑎᖁᑎᖃᕐᓂᑎᓄᑦ."

 

"ᐱᒋᐊᕐᓱᑕᓗ ᐊᒻᒪᓗ ᐅᓪᓗᒥᒐᓴᒃ, ᐱᓇᓱᐊᖃᑎᒌᓐᓂᑎᓂᒃ ᓲᔫᑎᑦᓯᓂᕗᑦ ᐊᒻᒪᓗ ᑮᓇᐅᔭᖃᕐᑎᑕᐅᓂᕐᓄᑦ ᐊᖏᖃᑎᒌᒍᑎᕗᑦ ᑲᕙᒪᑐᖃᒃᑯᓂᒃ ᐊᒻᒪᓗ ᐳᔮᕓᓐᓯᐅᑉ ᑲᕙᒪᖓᓂᒃ ᐊᒻᒪᓗ ᓄᓇᓕᓕᒫᓂ ᑎᒥᓂᒃ ᐅᕙᑦᑎᓂᒃ ᐱᒻᒪᕆᓐᓂᒃ ᐱᓇᓱᐊᕈᓐᓇᑎᑦᓯᕙᑦᑐᑦ," ᑌᒫᒃ ᐅᖄᓚᐅᕐᑐᖅ ᑲᔪᓯᖏᓐᓇᓚᖓᔪᓂᒃ ᐱᓇᓱᒐᑦᓴᖃᕐᑎᓯᓂᕐᓄᑦ ᐱᓇᓱᕝᕕᐅᑉ ᑲᒪᔨᒻᒪᕆᖓ ᓕᑎᐊ ᕗᐊᑦ. "ᐅᐱᒪᕗᒍᑦ ᐱᔪᓐᓇᓂᑦᑎᓂᒃ ᐊᒻᒪᓗ ᕿᓚᓈᕈᑎᖃᕐᓱᑕ ᑲᔪᓯᑎᑦᓯᓂᕐᓂᒃ ᐊᒥᓱᐃᓂᒃ ᐱᓇᓱᒐᕐᓂᒃ ᓄᓇᓕᓐᓂ".


ᓄᐃᑕᐅᓚᐅᕐᓂᕋᒥ, ᑫᐋᔩ ᒪᓂᔨᓯᒪᔨᐅᕙᑦᑐᖅ ᓴᓇᕐᕈᑎᓂᒃ ᓴᐳᑦᔭᐅᒍᑎᖏᓐᓂᒃ ᐃᓄᐃᑦ ᒪᑭᑕᒐᓱᐊᕈᑎᑦᓴᖏᑦᑕ ᐊᒻᒪᓗ ᐃᓅᖃᑎᒌᓐᓂᑯᑦ ᐱᕙᓪᓕᐊᓂᕐᓂᒃ ᒪᓕᑦᑐᓂᒃ ᓯᐊᒃᓴᓐ 29-ᖏᓐᓃᑐᓂᒃ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᓂ.

 

-30-

 

ᑐᑭᓯᒋᐊᕐᕕᓴᖅ:

ᔮᓐ-ᕕᓕᑉ ᑐᐳᐊ
ᑐᓴᐅᒪᐅᑎᓕᕆᓂᕐᓂᒃ ᑲᔪᓯᑎᑦᓯᔨ
ᑲᑎᕕᒃ ᓄᓇᓕᓕᒫᑦ ᑲᕙᒪᖓ
ᐅᖄᒍᑎᖓ 819-964-2961 ext. 2219
| www.krg.ca


ᑲᑎᕕᒃ ᓄᓇᓕᓕᒫᑦ ᑲᕙᒪᖓ 1978-ᒥ ᑎᒥᖕᖑᑎᑕᐅᓯᒪᔪᖅ ᐃᓄᓐᓄᐊᖓᔪᖅ ᐃᓕᒃᑰᑎᕐᑎᓯᒐᓂ, ᐊᑖᒎᕐᓱᓂ ᔦᒥᔅ ᐯ ᐊᒻᒪᓗ ᑯᐯᑉ ᑕᕐᕋᖓᑕ ᐊᖏᖃᑎᒌᒍᑎᐅᑉ, ᑖᓐᓇ ᑎᒥ ᐊᖓᔪᕐᖃᐅᕕᖃᕐᐳᖅ ᑯᐯᑉ ᑕᕐᕋᖓᑕ ᓄᓇᓕᒫᑲᓵᖓᓂᒃ 55 ᖁᓛᓂ ᐱᑦᔪᑎᒋᓗᒋᑦ ᓄᓇᓖᑦ ᑲᒪᒋᔭᖃᕐᓂᖏᑦ, ᐃᖏᕐᕋᐅᑎᓕᕆᓂᖅ, ᐊᕙᑎ, ᐳᓖᓯᖃᕐᓂᖅ, ᐱᓇᓱᒐᑦᓴᓕᕆᓂᖅ, ᐱᓇᓱᒋᐅᕐᓴᑎᑦᓯᓂᖅ, ᓂᕐᓯᑕᐅᑦᑕᑐᓕᕆᓂᖅ, ᐯᕆᑦᓯᕕᖃᕐᑎᓯᓂᖅ, ᓄᑕᐅᓪᓕᕈᓐᓇᑐᓕᕆᓂᖅ, ᓄᓇᐅᑉ ᐊᑐᕐᑕᐅᓂᖓᓄᑦ ᐸᕐᓀᒍᑎᓕᐅᕐᓂᖅ, ᐃᓄᓐᓂᒃ ᐊᑦᑕᓀᑦᑐᒦᑦᑎᓯᓂᖅ ᐊᒻᒪᓗ ᐱᕙᓪᓕᐊᑎᑦᓯᓂᖅ ᒪᑭᑕᒐᓱᐊᕈᑎᓂᒃ.