ᓯᕿᓂᖅ ᐱᓂᐊᕈᑎᖓ
KRG-ᑯᑦ ᐃᓅᖃᑎᒌᓂᒃ ᑕᑯᓐᓇᐅᔮᕐᑎᔨᓂᒃ ᐱᙳᐊᑎᓂᒃ ᐱᓂᐊᕈᑎᖓ ᓴᓇᑦᑑᒐᕐᑐᖅ ᐱᓇᓱᖃᑎᖃᑦᓯᐊᓱᓂ ᓯᐊᖅ ᑎ ᓱᓓᓪ®-ᑯᓐᓂᒃ. ᑕᒪᓐᓇ ᐊᕐᕌᒍᓂ-ᑕᓪᓕᒪᓂ ᐱᓇᓱᐊᕐᑕᐅᒍᒫᕐᓂᐊᑐᖅ ᑲᑦᓱᙰᓕᓭᒍᑕᐅᓗᓂ ᐅᕕᒃᑲᓂᒃ ᐱᐅᔪᒨᓕᖓᔪᓂᒃ ᐃᓅᓯᕆᓚᖓᓗᒋᑦ ᓂᕈᐊᕐᐸᓂᒃᑯᑦ, ᐊᑐᕐᑎᓯᑦᓱᓂ ᑎᒥᒧᑦ ᐱᙳᐊᕈᓐᓇᓂᕐᒥᒃ ᐅᕕᒃᑲᓄᑦ ᐃᓵᒍᑎᒋᑦᓱᒋᑦ. ᓴᕐᓕᐊᓂᓪᓗᓂ ᐃᒻᒥᓂᒃ-ᐱᐅᓇᓱᒋᓂᕐᒥᒃ, ᐃᓚᒋᔭᐅᓇᓱᒋᓂᕐᒥᒃ, ᐱᙳᐊᓂᒃᑯᑦ ᐊᒻᒪᓗ ᐃᓱᒪᙳᐊᓕᐅᕐᓂᑯᑦ ᐅᖃᕐᓂᒥᒃ, ᐊᒻᒪᓗ ᐳᐃᒍᕐᓂᐊᓇᒋᑦ ᑲᑦᓱᙰᓐᓂᒥᒃ ᐊᒻᒪᓗ ᓴᐱᓕᕐᑕᖏᓐᓂᒥᒃ, KRG-ᑯᑦ ᐱᓂᐊᕈᑎᖓ ᑐᕌᕐᑐᖅ ᑫᓪᓗᑐᕐᓂᒧᑦ ᐃᓕᓐᓂᐊᓂᕐᒥᒃ ᐊᒻᒪᓗ ᐱᓇᓱᒐᖃᕐᓂᒥᒃ, ᐃᑯᓪᓚᑎᑦᓯᓂᕐᒧᓗ ᐃᒥᐊᓗᐃᑦ ᐊᒻᒪᓗ ᐋᖓᔮᓐᓇᑐᑦ ᐊᑐᕐᓂᓗᑦᑕᐅᓂᖏᓐᓂᒃ, ᐊᒻᒪᓗ ᐋᓐᓂᑎᕆᐅᑎᓂᒃ ᐊᑐᕐᑎᓯᑦᑌᓕᓂᕐᒧᑦ. ᐃᓱᒪᑖᕈᑕᐅᑦᓱᓂ ᓯᐊᖅ ᑎ ᓱᓓᓪ ᐃᑲᔪᕐᓯᒋᐊᕐᓂᒥᒃ ᐱᓇᓱᐊᕈᑎᖓᓂᒃ, ᓯᐊᖅ ᑐ ᒨᓐᑦ-ᒥᒃ, KRG-ᑯᑦ ᐱᓂᐊᕈᑎᖓ ᐱᒋᐊᕐᑎᑕᐅᓚᐅᔪᔪᖅ ᐅᑭᐊᖑᓕᕐᑎᓗᒍ 2009-ᒥ ᖃᓄᕐᑑᖃᑕᐅᑎᓪᓗᒋᑦ ᑲᑎᕕᒃ ᐃᓕᓐᓂᐊᓂᓕᕆᔩᑦ ᐊᒻᒪᓗ ᒪᑭᕝᕕᑯᑦ.
KRG-ᑯᑦ ᐃᓅᖃᑎᒌᓂᒃ ᑕᑯᓐᓇᐅᔮᕐᑎᔨᓂᒃ ᐱᙳᐊᑎᓂᒃ ᐱᓂᐊᕈᑎᖓ ᓂᕈᐊᕐᓯᒪᔭᓕᒃ, ᑐᕌᖓᑦᓱᓂ ᐅᕕᒃᑲᓕᒫᓄᑦ: ᐃᓕᓐᓂᐊᑎᓄᑦ ᐊᒻᒪᓗ ᐅᕕᒃᑲᐅᓱᑎᒃ ᐃᓄᓐᓄᑦ ᐃᓕᓐᓂᐊᑎᐅᒍᓐᓀᑐᓄᑦ. ᖃᓗᓯᑦᓱᓂ ᐊᑦᔨᒌᙱᑐᓂᒃ ᐱᙳᐊᕈᓯᒐᓚᓐᓂᒃ ᐊᒻᒪᓗ ᑕᑯᓐᓇᐅᔮᕐᑎᓯᓂᒐᓚᓐᓂᒃ (ᐃᓪᓗᑭᑕᕐᓂᖅ, ᓇᐸᒃᑲᑕᕐᓂᒐᓓᑦ, ᑖᓂᓯᕐᓂᖅ, ᑐᓴᕐᓂᔮᕐᑎᓯᓂᖅ, ᐃᔪᕐᓵᓂᖅ ᐊᒻᒪᓗ ᐱᙳᐊᕕᐅᑉ ᐱᖁᑎᙳᐊᖏᓐᓂᒃ ᓴᓇᓂᖅ, ᐊᓯᖏᑦ ᐱᒻᒥᑎᓪᓗᒋᑦ), ᑖᓐᓇ ᐱᓂᐊᕈᑎ ᐊᓕᐊᒋᔭᐅᓲᖅ ᐊᑦᔨᒌᙱᑐᐹᓗᓐᓂᒃ ᐱᐅᑦᓴᑐᓄᑦ ᐊᒻᒪᓗ ᑫᓪᓗᐊᕈᑕᐅᑦᓱᓂ ᐅᕕᒃᑲᓂᒃ ᐱᙳᐊᕈᓯᕐᒥᓂ ᐃᓚᐅᕐᑐᓂᓐᓂᑯᑦ ᐅᐊᕈᑎᓂᒃ ᓇᒻᒥᓂᖅ ᐃᓗᕐᖁᓯᑦᓴᔭᒥᓄᑦ.
