ᐃᓅᒐᓱᐊᕐᓂᑯᑦ ᐊᑭᑐᔪᒥᐅᒍᓂᕐᒥᑦ ᑲᑕᑦᔫᒥᑎᑦᓯᒐᓱᐊᕐᓂᒧᑦ ᖃᓄᐃᓕᖓᒋᐊᕈᑎᐅᔪᑦ
ᐊᑖᒍᑦ ᑮᓇᐅᔭᖃᕐᑎᓯᓂᕐᒧᑦ ᐊᖏᖃᑎᒌᓐᓂᐅᑉ ᐊᑎᓕᐅᖃᑎᒌᒍᑎᕕᓂᐅᔪᖅ ᑯᐯᑉᑯᑦ ᑲᕙᒪᖏᓐᓄᑦ 2007-ᒥ ᐊᕐᕌᒍᓄᑦ ᐱᖓᓱᓅᓕᖓᔪᒥᑦ ᓄᑕᐅᓯᓕᒋᐊᕐᑕᕕᓂᐅᕗᖅ 2010-ᒥ ᐊᒻᒪᓗ 2011-ᒥ ᐊᑐᓂ ᐊᕐᕌᒍᒋᐊᓪᓚᒥᒃ ᐃᓚᒋᕐᑕᐅᖃᑦᑕᑎᓪᓗᒋᒃ, ᑖᒃᑯᐊ ᒪᑭᕕᒃ ᑯᐸᐅᕇᓴ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᑲᔪᓯᑎᑦᓯᒪᓃᒃ ᐱᖓᓲᔪᕐᑐᓂᒃ ᐱᒋᐊᕐᑎᑕᐅᓯᒪᔪᓂᒃ ᖃᓄᐃᓕᖓᒋᐊᕈᑎᖃᕐᓂᑯᑦ ᐃᑲᔪᕐᓯᒍᑎᑦᓴᒫᓂᒃ ᑲᑕᑦᔫᒥᑎᑦᓯᒐᓱᐊᕐᓂᒧᑦ ᐊᑭᔪᒻᒪᕆᐅᒍᓂᕐᒥᑦ ᐃᓅᒐᓱᐊᕐᓂᑎᒍᑦ ᐊᑑᑎᔭᐅᔪᒥᑦ ᓄᓇᕕᒻᒥᐅᓄᑦ.
ᑖᒃᑯᐊ ᐱᖓᓲᔪᕐᑐᑦ ᐊᑭᔪᒻᒪᕆᒻᒥᐅᒍᓂᕐᒥᑦ ᑲᑕᑦᔫᒥᑎᑦᓯᒐᓱᐊᓂᕐᒧᑦ ᖃᓄᐃᓕᖓᒋᐊᕈᑎᐅᓯᒪᔪᑦ ᐃᒣᑦᑐᑦ:
- ᓂᕿᓅᓕᖓᔪᖅ ᐱᓂᐊᕐᓂᑕᖅ
- ᐅᓯᔭᐅᒍᑎᒃᑰᑎᑦᓯᓂᕐᒧᑦ ᐃᑲᔪᕐᓯᒋᐊᕈᑎᐅᑉ ᐱᓂᐊᓂᕐᑕᖓ
- ᓴᐳᒻᒥᔭᖃᕐᓂᖅ ᐃᓄᐃᑦ ᓂᕿᑦᓴᓯᐅᓂᕐᒧᑦ ᐱᓇᐊᓱᕐᓂᖏᒍᑦ
- ᑳᓴᓖᕐᑕᓂᒃᑯ ᐃᑲᔪᕐᓯᒋᐊᕐᓂᒧᑦ ᐱᓂᐊᕐᓂᑕᖅ
- ᖃᖓᑦᑕᐅᑎᑎᒍᑦ ᐊᑭᑭᓪᓕᒋᐊᕆᓂᕐᒧᑦ ᐱᓂᐊᓂᕐᑕᖅ
- ᐃᓗᑐᙯᑦ ᐃᑲᔪᕐᓯᔭᐅᒋᐊᕈᑎᖏᑦ
ᑮᓇᐅᔭᖃᕐᑎᓯᒍᑎᐅᔪᑦ ᑕᒪᒃᑯᓂᖓ ᐱᒋᐊᕐᑎᓯᒍᑎᐅᒪᔪᓂᒃ ᖃᓄᐃᓕᒋᐊᕈᑎᐅᔪᓂᒃ ᑲᔪᓯᑎᑕᐅᓲᖑᕗᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖔᓄᑦ ᐊᒻᒪᓗ ᒪᑭᕝᕕᒃ ᑯᐊᐳᕇᓴᒧᑦ ᐊᑭᓕᕐᑐᐃᒍᑎᐅᓲᑦ ᐊᑐᕐᓱᑎᒃ ᐊᖏᖃᑎᒌᒍᑎᒥᒃ. ᑌᒣᒪᑦ ᑕᒐ, ᑕᒪᒃᑯᐊ ᖃᓄᐃᓕᖓᒋᐊᕈᑎᐅᒪᔪᑦ ᐊᓯᑦᔨᑐᕆᐊᕐᑕᐅᒍᓐᓇᑐᑦ ᐅᕝᕙᓗᓐᓃᑦ ᓄᕐᖃᑎᑕᐅᑦᓯᐊᕈᓐᓇᑐᑦ ᖃᖓᑐᐃᓐᓇᓕᒫᒃᑯᑦ. ᐊᐅᓚᑦᓯᔨᐅᓂᕐᒥᒍᑦ ᑖᒃᑯᓂᖓ ᑮᓇᐅᔭᓂᒃ, ᑖᓐᓇ ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᑲᒪᑦᓯᐊᕋᓱᐊᕐᑐᒪᕆᒃ ᑖᒃᑯᐊ ᐃᓗᓐᓇᑎᒃ ᐱᖓᓲᔪᕐᑐᑦ ᐊᑭᑐᔪᒥᐅᒍᓂᕐᒧᑦ ᑲᑕᑦᔫᒥᑎᑦᓯᒋᐊᕋᓱᐊᕐᓂᒧᑦ ᖃᓄᐃᓕᖓᒋᐊᕈᑎᐅᓯᒪᔪᑦ ᐃᑉᐱᒋᔭᖃᑦᓯᐊᕋᓱᐊᕐᑐᑦ ᑕᒪᒃᑯᐊ ᐊᑭᓖᒍᑏᑦ ᐅᖓᑖᓅᓕᙱᑲᓗᐊᕐᒪᖔᑕ ᐊᑐᐃᓐᓇᐅᓂᖏᑦᑕ ᑮᓇᐅᔦᑦ.
