ᐃᓗᓐᓈᒍᑦ ᑐᑭᓯᒪᒐᑦᓴᐃᑦ
ᑐᑭᒋᒋᐊᕐᓯᒪᔭᖓ ᐃᓚᖓᑕ 29 ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂᒃ ᐊᖏᖃᑎᒌᓐᓂᒥ, ᐱᑦᔪᑎᖃᕐᓱᓂ ᐃᓄᐃᑦ ᒪᑭᑕᐅᑎᑎᒍᑦ ᐊᒻᓗ ᐃᓅᖃᑎᒌᓐᓂᑎᒍᑦ ᐱᕙᓪᓕᐊᓂᖏᓐᓂᒃ, ᐲᕐᕕᖃᕋᓂ ᐃᓚᐅᕐᑐᓯᒪᕗᖅ ᐱᓇᓱᐊᒐᕐᒧᑦ ᐱᓇᓱᒐᖃᕐᓂᒥᒃ, ᐱᒋᐅᕐᓴᓂᕐᒥᒃ, ᑮᓇᐅᔭᕐᑖᓂᒃᑯᑦ ᓴᐳᒻᒥᓂᕐᒥᒃ ᐊᒻᒪᓗ ᐱᐊᕋᕐᓂᒃ ᐯᕆᑦᓯᓂᕐᒥᒃ ᐱᓇᓱᕝᕕᒥ. ᐱᓗᐊᕐᓱᒍ, ᑕᒪᓐᓇ ᐱᓇᓱᐊᒐᖅ ᐱᓕᕐᐸᓕᐊᔪᒥᒃ ᓯᕗᒧᐊᕐᑎᑕᐅᓯᒪᔪᖅ ᑕᒡᒐᓂ ᐱᓇᓱᕝᕕᒥ 1992-ᒥᓂᒃ ᑎᒍᓚᒍᑕᐅᑦᓱᓂ ᑲᒪᔨᐅᓂᕐᒥᒃ ᐊᑦᑐᐊᔪᓂᒃ ᑲᕙᒪᑐᖃᒃᑯᑦ ᑯᐯᒃᑯᓗ ᑲᕙᒪᖓᑕ ᐱᓂᐊᕈᑎᑦᓴᔭᖏᓐᓂᒃ. ᑖᑦᓱᒪ ᐱᓇᓱᕝᕕᐅᑉ ᐱᓇᓱᐊᒐᖏᑦ ᐱᖓᓱᐃᓕᖓᔪᒥᒃ ᐊᕕᑦᑐᓯᒪᔪᑦ:
• ᑮᓇᐅᔭᕐᑖᓂᒃᑯᑦ ᓴᐳᒻᒥᓯᒍᑏᑦ.
• ᐊᕋᐃᑦ ᐯᕆᔭᐅᓂᖏᑦ.
• ᐱᓇᓱᒐᖃᕐᓂᖅ ᐊᒻᒪᓗ ᐱᒋᐅᕐᓴᓂᖅ.
ᑮᓇᐅᔭᖃᕐᑎᓯᓂᖅ ᐱᓇᓱᕝᕕᐅᑉ ᐊᐅᓚᓂᖓᓂᒃ ᐊᒻᒪᓗ ᐱᓇᓱᓐᓂᖏᓐᓂᒃ ᐱᔭᐅᓲᖑᕗᖅ ᐊᖏᖃᑎᒌᒍᑎᓂᒃ ᐃᓚᐅᕕᐅᔪᓂᒃ ᐃᓄᓐᓂᒃ ᐱᓇᓱᑦᑎᓂᒃ ᐱᕙᓪᓕᐊᑎᑦᓯᔨᒃᑯᓄᑦ ᑳᓇᑕᒥ, ᐊᓪᓚᓂᒃ ᐊᒻᒪᓗ ᐅᑭᐅᕐᑕᑐᒥᐅᓂᒃ ᑲᒪᔨᒃᑯᓄᑦ ᑳᓇᑕᒥ, ᐊᒻᒪᓗ ᐃᓄᓕᒫᑦ ᐃᓗᓯᕐᓱᓂᖏᓐᓄᑦ ᑎᒥᒥᒃ ᑳᓇᑕᒥ. ᑯᐯᒃᑯᑦ ᑲᕙᒪᖓ ᐃᓕᔨᓲᖅ ᐃᑲᔪᕐᓯᐅᑎᒥᓂᒃ ᐱᓇᓱᕝᕕᐅᑉ ᐱᓇᓱᓐᓂᖓᓄᑦ ᐊᕐᖁᖃᕐᓱᓂ ᐱᖃᑎᒌᓐᓂᒧᑦ ᐊᖏᖃᑎᒌᓐᓂᒥᒃ ᐱᑦᔪᑎᓕᒻᒥᒃ ᒪᑭᑕᐅᑏᑦ ᐊᒻᒪᓗ ᓄᓇᓖᑦ ᐱᕙᓪᓕᐊᓂᖏᓐᓂᒃ ᓄᓇᕕᒻᒥ (ᓴᓇᕐᕈᑎᒃ ᐊᖏᖃᑎᒌᓐᓂᖅ) ᐊᒻᒪᓗ ᐊᖏᖃᑎᒌᓐᓂᒥᒃ ᐱᑦᔪᑎᓕᒻᒥᒃ ᐃᓗᐃᒃᑲᓂᒃ ᑮᓇᐅᔭᕐᑖᑎᑦᓯᒍᑎᓂᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ (ᓯᕗᓂᕐᒧᑦ ᐊᖏᖃᑎᒌᓐᓂᖅ).
