ᐃᓗᓐᓀᓄᑦ ᑐᑭᓯᒪᐅᑎᑦᓴᖏᑦ
ᑖᒃᑯᐊ ᒥᓂᓯᐹᓕᑎᒃᑯᑦ ᐃᓄᓕᒫᓂᒃ ᐱᓇᓱᒍᑦᔨᕕᖓᑕ ᐱᓇᓱᐊᕐᕕᖓᑦ ᑎᓕᔭᐅᒪᒍᑎᖃᓗᐊᖑᐊᑐᖅ ᐃᑲᔪᕐᓯᒋᐊᖃᕐᓂᒥᒃ ᓄᓇᓕᓐᓂᒃ ᐱᔪᓐᓇᓯᑎᑦᓱᒋᑦ ᐃᓱᐊᖁᑎᐅᒋᐊᓕᓐᓂᒃ ᐱᕙᓪᓕᐊᒍᑎᑦᓴᖏᓐᓄᑦ, ᑕᒪᒃᑯᓂᖓᓗ ᐃᓱᐊᖁᑎᓂᒃ ᐊᑐᕈᓐᓇᖏᓐᓇᑎᑦᓯᓯᐊᕐᓗᓂ ᐊᒻᒪᓗ, ᐱᔭᕆᐊᖃᕐᐸᑦ, ᓄᑕᐅᓯᓕᕐᑎᒋᐊᖃᑦᑕᒥᓗᒋᑦ. ᐱᓇᓱᐊᕐᕕᐅᑉ ᓱᓇᓱᐊᕐᑕᓕᒫᖏᑦ ᑕᒪᑐᒧᖓ ᑲᔪᓯᑎᑕᐅᓲᑦ ᐱᓇᓱᐊᖃᑎᒋᑦᓱᒋᑦ ᑕᕐᕋᒥᐅᑦ ᓄᓇᓕᖏᑦ. ᐊᓪᓛᑦ, ᑕᕐᕋᒥᐅᑦ ᓄᓇᓕᖏᑦᑕ ᐃᓚᐅᖃᑕᐅᓪᓚᕆᓲᖑᓂᖏᑦ ᐃᓚᒋᔭᐅᓪᓚᕆᑦᓱᓂᓘᕐᒪᑦ ᐱᓇᓱᐊᕐᕕᐅᑉ ᓱᓇᓱᐊᕐᓂᕆᓲᖏᓐᓄᑦ.
ᑖᒃᑯᐊ ᒥᓂᓯᐹᓕᑎᒃᑯᑦ ᐃᓄᓕᒫᓂᒃ ᐱᓇᓱᒍᑦᔨᕕᖓᑕ ᐱᓇᓱᐊᕐᕕᖓᑦ ᐃᑉᐱᒋᔭᖃᓲᖑᕗᖅ ᑲᔪᓯᑎᑕᐅᔪᖃᓕᑐᐊᕐᒪᑦ ᐊᒥᓱᒐᓚᓐᓂᒃ ᐃᑲᔪᕐᓯᒪᐅᑎᓂᒃ ᐱᓇᓱᐊᕐᑕᐅᔪᓂᓪᓗ ᑲᕙᒪᒃᑯᓗ ᐊᖏᖃᑎᒌᒍᑎᒋᓯᒪᔭᖏᑦᑕ ᐊᑖᒍᕐᑐᓂᒃ, ᐃᓚᖃᕐᑐᓂᒃ ᐃᓱᕐᕉᑏᑦ ᐃᑲᔪᕐᓯᒪᐅᑎᖏᑦ ᒥᓂᓯᐹᓕᑏᑦ ᐃᓱᐊᖁᑎᖏᓐᓂᒃ ᐱᐅᓯᓕᐅᒥᑎᑦᓯᒋᐊᕈᑎᐅᓂᐊᕐᑐᓄᑦ, ᐅᕐᓱᐊᓗᒻᒧᑦ ᑖᒃᓯᔦᖏᑑᓂᕐᒧᑦ ᐊᒻᒪᓗ ᑯᐯᒃᑯᑦ ᑐᓂᕐᕈᑎᖏᓐᓄᑦ ᐃᑲᔪᕐᓯᒪᐅᑎᖏᓐᓂᒃ, ᐱᕙᓪᓕᐅᑏᑦ ᐃᑲᔪᕐᓯᒪᐅᑎᖏᑦ ᓄᓇᓖᑦ ᐃᓱᐊᖁᑎᖏᓐᓂᒃ ᐱᕙᓪᓕᐊᑎᑦᓯᒍᑎᑦᓴᒧᑦ, ᐱᓪᓗᑯᒋᐊᓕᓐᓄᑦ ᐃᑲᔪᕐᓯᒍᑎᓄᑦ ᐃᑲᔪᕐᓯᒪᐅᑎᖏᓐᓂᒃ, ᐱᙳᐊᓂᓕᕆᓂᕐᒧᓗ ᓱᖃᑦᓯᓂᓕᕆᓂᕐᒧᓗ ᐃᓱᐊᖁᑎᖏᓐᓄᑦ ᓴᐳᒻᒥᔭᐅᒍᑎᖏᑦᑕ ᐃᑲᔪᕐᓯᒪᐅᑎᖏᓐᓂᒃ, ᐊᕐᖁᑎᓂᒃ ᕿᕐᓱᑎᑎᒐᕐᑐᐃᓂᐅᑉ ᐱᓇᓱᐊᕐᑕᐅᓂᖓᓂᓪᓗ. ᑖᓐᓇ ᐱᓇᓱᐊᕐᕕᒃ ᑲᒪᒋᔭᖃᓲᖑᒻᒥᔪᖅ ᐊᑦᔨᒌᖏᑐᓂᒃ ᐊᖏᖃᑎᒌᒍᑎᐅᓯᒪᔪᓂᒃ ᐊᒥᓱᒻᒪᕆᓐᓂᓗ ᓴᓇᓂᕐᒧᑦ ᐱᓇᓱᐊᕐᑕᐅᔪᓂᒃ ᑭᒡᒐᑐᕐᓱᒋᑦ ᑯᐯᒃ ᑲᕙᒪᖓᑦ, ᑲᑎᕕᒃᑯᓗ ᐊᒻᒪᓗ ᑕᕐᕋᒥᐅᑦ ᓄᓇᓕᖏᑦ.
ᐱᓇᓱᐊᕐᕕᒃ ᑮᓇᐅᔭᖃᕐᑎᑕᐅᓲᖑᕗᖅ ᐱᓇᓱᐊᕐᑕᐅᔪᐃᑦ ᑲᒪᒋᔭᐅᒍᑎᖏᑦᑕ ᐊᑭᓕᕐᑕᐅᒍᑎᖏᓐᓄᑦ ᐊᑭᓕᕋᑦᓴᓕᐅᕐᑕᐅᓲᓂᒃ ᑲᑎᕕᒃᑯᓄᑦ ᐊᑖᒍᕐᑐᓂᒃ ᐊᑦᔨᒌᖏᑐᓄᑦ ᐊᖏᖃᑎᒌᒍᑎᓄᑦ ᑕᒪᑦᓱᒧᖓ ᐃᑲᔪᕐᓯᒪᐅᑎᓄᑦ ᐱᓇᓱᐊᑕᐅᔪᓄᓪᓗ ᑕᒡᒐᓂ ᐅᖃᕐᑕᐅᑫᓐᓇᑐᕐᓄᑦ, ᐃᓚᖃᕐᑐᓂᒃ ᐊᖏᖃᑎᒌᒍᑎᓂᒃ ᑕᒪᑦᓱᒧᖓ ᐃᓗᐃᒃᑲᐅᓈᕐᑎᑐᓂᒃ ᑮᓇᐅᔭᖃᕐᑎᓯᓂᕐᒧᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ (ᓯᕗᓂᕐᒧᑦ ᐊᖏᖃᑎᒌᒍᑎᖏᓐᓂᒃ).
