ᐃᓘᓐᓈᒎᕐᑐᑦ ᖃᐅᔨᒪᔭᑦᓭᑦ
ᐊᑎᑐᐃᓐᓇᖓ ᑕᒐ ᐃᓱᒪᓇᕐᑎᓯᑦᓴᐅᑎᒋᒻᒪᑦ, ᑖᓐᓇ ᓄᑕᐅᓯᓕᕈᓐᓇᑐᓂᒃ ᐱᕙᓪᓕᖁᑎᓕᕆᓂᕐᒥᒃ, ᐊᕙᑎᓕᕆᓂᐅᓪᓗ ᐊᒻᒪᓗ ᓄᓇᐅᑉ ᐊᑐᕐᓂᖏᑕ ᐸᕐᓇᕈᑕᐅᓂᖏᓐᓂᒃ ᐱᓇᓱᕝᕕᒃ ᐊᒥᓱᐊᓗᓐᓂᒃ ᐊᑦᔨᒌᙱᑐᓂᒃ ᑲᒪᒋᔭᑦᓴᓕᒃ. ᐱᓇᓱᕝᕕᐅᑉ ᐱᓇᓱᓐᓂᖏᑦ ᐊᕕᑦᑐᓯᒪᔪᑦ ᐱᖓᓲᔪᕐᑐᐃᓄᑦ ᐱᒻᒪᕆᐅᓂᕐᐹᓂᒃ ᓵᙵᓯᒍᑎᓄᑦ:
• ᐃᓄᐃᑦ ᐆᒪᔪᕐᓂᐊᓂᖏᓐᓂᒃ, ᐃᖃᓗᓐᓂᐊᓂᖏᓐᓂᒃ ᐊᒻᒪᓗ ᒥᑭᒋᐊᕐᓂᐊᓂᖏᓐᓂᒃ ᓴᐳᒻᒥᓂᕐᒥᒃ ᐱᓂᐊᕈᑎ.
• ᒥᕐᖑᐃᓯᕐᕖᑦ ᐱᕙᓪᓕᐊᓂᖏᑦ ᐊᒻᒪᓗ ᐊᐅᓚᓂᖏᑦ.
• ᐆᒪᔪᓂᒃ ᐊᕐᖃᓓᒍᑎᖃᕐᓂᖅ.
• ᐊᕙᑎᓕᕆᓂᖅ.
• ᓄᓇᐅᑉ ᐊᑐᕐᓂᓴᖏᓐᓂᒃ ᐸᕐᓇᓂᖅ.
ᑮᓇᐅᔭᖁᑎᖏᑦ ᐱᓇᓱᕝᕕᐅᑉ ᐱᓇᓱᓐᓂᖓᓄᑦ ᒥᕐᖑᐃᓯᕐᕕᓕᕆᓂᐅᑉ, ᓄᓇᒥᐅᑕᓂᒃ ᐊᒻᒪᓗ ᐃᒪᑦᓯᐊᒥᐅᑕᓂᒃ ᐆᒪᔪᓂᒃ ᐊᕐᖃᓓᒍᑎᖃᕐᓂᐅᑉ, ᐊᒻᒪᓗ ᓄᓀᑦ ᐊᑐᕐᓂᓴᖏᓐᓂᒃ ᐸᕐᓇᓂᐅᑉ ᑐᑭᖏᑎᒍᑦ ᐱᔭᐅᓲᖑᕗᑦ ᑯᐯᒃᑯᑦ ᑲᕙᒪᖓᓂᒃ ᐊᕐᖁᑎᖃᕐᓱᑎᒃ ᐊᖏᖃᑎᒌᓐᓂᒥᒃ ᐱᑦᔪᑎᓕᒻᒥᒃ ᐃᓗᐃᒃᑲᓂᒃ ᑮᓇᐅᔭᕐᑖᑎᑦᓯᓂᕐᒥᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ (ᓯᕗᓂᕐᒧᑦ ᐊᖏᖃᑎᒌᓐᓂᒥᒃ). ᑮᓇᐅᔦᑦ ᐊᑐᕐᑐᑦ ᐱᓇᓱᓐᓂᒧᑦ ᐃᓄᐃᑦ ᐆᒪᔪᕐᓂᐊᓂᖏᓐᓂᒃ, ᐃᖃᓗᓐᓂᐊᓂᖏᓐᓂᒃ ᐊᒻᒪᓗ ᒥᑭᒋᐊᕐᓂᐊᓂᖏᓐᓂᒃ ᓴᐳᒻᒥᓂᐅᑉ ᐱᓂᐊᕈᑎᖓᓂᒃ, ᑕᕆᐅᒥ ᐆᒪᔪᓂᒃ ᐊᕐᖃᓓᒍᑎᖃᕐᓂᒥᒃ, ᐃᐱᕋᕐᑕᐅᓂᑯᐃᑦ ᐅᔭᕋᓐᓂᐊᕋᑦᓴᓯᐅᕐᑎᓄᑦ ᓄᓇᑐᕐᓕᕕᓃᑦ ᓴᓗᒻᒪᓴᕐᓂᖏᓐᓄᑦ ᐊᒻᒪᓗ ᐊᓯᐊᒍᑦ ᐊᕙᑎᓕᕆᓂᐅᑉ ᑐᑭᐊᒍᑦ ᐊᑐᕐᑐᑦ, ᐊᓯᖏᓪᓗ ᓱᓕ ᐱᒻᒥᓱᑎᒃ, ᐱᔭᐅᓲᖑᕗᑦ ᑕᒪᒃᑯᓄᖓᓪᓗᐊᖅ ᐃᓕᖓᔪᓂᒃ ᐊᖏᖃᑎᒌᒍᑎᓂᒃ ᐊᑦᑐᐊᔭᐅᔪᓂᒃ ᒥᓂᔅᑕᒃᑯᓄᑦ ᓯᓚᐅᑉ ᐱᕙᓪᓕᖁᑎᖏᓐᓄᑦ ᐊᒻᒪᓗ ᐆᒪᔪᓄᑦ, ᐱᓇᓱᕝᕕᒪᕆᒻᒧᑦ ᐃᖃᓗᓐᓂᐊᕕᓐᓂᒃ ᐊᒻᒪᓗ ᐃᒪᕐᐱᓂᒃ, ᓴᑐᕐᓂᒧᑦ-ᐊᐅᓚᑦᔭᓂᖅ ᓄᓇᕕᒻᒧᑦ, ᒥᓂᔅᑕᒧᑦ ᓄᓇᓕᓕᕆᓂᕐᒧᑦ, ᓄᓇᖁᑎᓄᑦ ᐊᒻᒪᓗ ᓄᓇᐅᑉ ᓇᔪᕐᑕᐅᓂᖓᓄᑦ, ᒥᓂᔅᑕᒧᑦ ᐃᖏᕐᕋᔪᓕᕆᓂᕐᒧᑦ ᑯᐯᒃᒥ, ᐊᒻᒪᓗ ᒥᓂᔅᑕᒧᑦ ᒪᑭᑕᔭᓪᓗᐊᒥᒃ ᐱᕙᓪᓕᐊᑎᑦᓯᓂᕐᒧᑦ, ᐊᕙᑎᒧᑦ ᐊᒻᒪᓗ ᒥᕐᖑᐃᓯᕐᕕᓄᑦ.
