ᐃᓘᓐᓈᒎᕐᑐᑦ ᖃᐅᔨᒪᔭᑦᓭᑦ
ᖃᐅᔨᓴᕐᓂᒥᒃ ᐊᒻᒪᓗ ᒪᑭᑕᐅᑎᓂᒃ ᐱᕙᓪᓕᐊᓂᕐᒥᒃ ᐱᓇᓱᕝᕕᒃ ᐊᑐᕐᐳᖅ ᑲᓱᕐᓂᒪᕆᐅᑦᓱᓂ ᑯᐯᒃᑯᑦ ᐊᒻᒪᓗ ᑲᕙᒪᑐᖃᒃᑯᑦ ᑲᕙᒪᖏᓐᓄᑦ ᐊᒻᒪᓗ ᑕᒫᓂ ᓄᓇᒥ ᑮᓇᐅᔭᓕᐅᕐᑎᓄᑦ ᐊᒻᒪᓗ ᐃᓅᖃᑎᒌᑎᒍᑦ ᒪᑭᑕᐅᑎᐅᑦᓱᑎᒃ ᐊᐅᓚᔪᓄᑦ. ᖃᓂᑦᑐᒪᕆᒻᒥᒃ ᐊᑦᑐᐊᒥᔪᖅ ᓄᓇᓕᓐᓂ ᐃᓄᐃᑦ-ᒪᑭᑕᐅᑎᑦᓴᖏᓐᓂᒃ ᐸᕐᓇᓂᕐᒧᑦ. ᑕᒡᒐᓂ ᐱᓇᓱᕝᕕᒥ ᐱᓇᓱᑦᑕᐅᕙᑦᑐᑦ ᐱᖓᓱᐃᓕᓗᒋᑦ ᑲᒪᒋᓂᕐᐹᑎᒍᑦ ᐊᕕᑦᑐᕈᓐᓇᑐᑦ ᒪᑯᓄᖓ: ᓄᓇᓕᒫᒥ ᐱᕙᓪᓕᐊᑎᑦᓯᓂᖅ, ᓄᓇᓕᒻᒥ ᐱᕙᓪᓕᐊᑎᑦᓯᓂᖅ ᐊᒻᒪᓗ ᑮᓇᐅᔭᓕᐅᕐᑎᓂᒃ ᐱᕙᓪᓕᐊᑎᑦᓯᓂᖅ.
ᑖᑦᓱᒪ ᐱᓇᓱᕝᕕᐅᑉ ᐱᓇᓱᓐᓂᖏᑦ ᐃᓘᓐᓈᒐᓚᑎᒃ ᑮᓇᐅᔭᕐᑑᑎᖏᑦ ᐱᕙᑦᑐᑦ ᑯᐯᒃᑯᑦ ᑲᕙᒪᖓᓂᒃ ᐊᕐᖁᑎᖃᕐᓱᑎᒃ ᐊᖏᖃᑎᒌᓐᓂᒥᒃ ᐱᑦᔪᑎᓕᒻᒥᒃ ᐃᓗᐃᒃᑲᓂᒃ ᑮᓇᐅᔭᕐᑖᑎᑦᓯᓂᕐᒥᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ (ᓯᕗᓂᕐᒧᑦ ᐊᖏᖃᑎᒌᓐᓂᒥᒃ). ᑮᓇᐅᔭᒋᐊᓪᓓᑦ ᐊᑦᔨᐅᖏᑦᑐᓂᒃ ᐱᓇᓱᒍᑎᓅᓕᖓᔪᑦ ᑮᓇᐅᔭᕐᑖᕈᑕᐅᕙᒻᒥᔪᑦ ᑕᒪᒃᑯᓄᖓᓪᓗᑯᒃ ᐊᑦᑐᐊᔪᓂᒃ ᑯᐯᒃᑯᒃ-ᑲᓇᑕᒃᑯᓗ ᐱᓇᓱᕝᕕᖏᓐᓂᒃ ᐊᒻᒪᓗ ᓱᓕ ᐊᓪᓚᓂᒃ ᐊᒻᒪᓗ ᐅᑭᐅᕐᑕᑐᒥᐅᓂᒃ ᑲᒪᔨᒃᑯᓂᒃ ᑳᓇᑕᒥ.
