ᑲᑎᕕᒃ ᓄᓇᓕᓕᒫᑦ ᐳᓖᓯᒃᑯᖏᑦ
ᑲᑎᕕᒃ ᓄᓇᓕᓕᒫᑦ ᐳᓖᓯᒃᑯᖏᑦ (KRPF) ᐱᙳᑎᑕᐅᓯᒪᕗᑦ 1996-ᒥ ᐃᑲᔪᕐᑎᓗᒋᑦ ᐃᕐᖃᑐᕐᑕᐅᑎᑦᓯᔨᒻᒪᕆᒃᑯᑦ ᑳᓇᑕᒥ ᐊᒻᒪᓗ ᒥᓂᔅᑕᒃᑯᑦ ᐃᓄᐃᑦ ᐊᑦᑕᓇᕐᓯᑕᐃᓕᓂᖏᓐᓄᑦ, ᑕᒪᓐᓇ ᒪᓕᒍᑎᒋᑦᓱᒍ ᑐᕌᕐᑕᐅᓯᒪᔪᒥᒃ ᔭᐃᒻᔅ ᐸᐃᒥ ᐊᒻᒪᓗ ᑯᐸᐃᒃ ᑕᕐᕋᖓᓂᒃ ᐊᖏᖃᑎᒌᓐᓂᒧᑦ ᐊᒻᒪᓗ ᒪᓕᒍᑎᒋᑦᓱᒍ ᐃᓚᖓᓂᒃ 369-ᒥᒃ ᐱᖁᔭᒥ ᐱᑦᔪᑎᓕᒻᒥ ᐅᑭᐅᕐᑕᑐᒥᐅᑦ ᓄᓇᓕᖏᓐᓂᒃ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ. JBNQA-ᒥ ᐅᖃᕐᓯᒪᕗᖅ ᐃᒫᒃ "ᐱᔭᑦᓴᕆᔭᐅᓂᐊᕐᐳᑦ ᑲᑎᕕᒃ ᓄᓇᓕᓕᒫᑦ ᐳᓖᓯᖏᓐᓄᑦ ᐊᒻᒪᓗ ᐊᑐᓂ ᑖᒃᑯᓄᖓ ᐃᓚᐅᔪᒧᑦ ᒪᑭᑕᑦᓯᓂᖅ ᓴᐃᒪᓂᕐᒥᒃ, ᑐᑭᖃᑦᓯᐊᓂᕐᒥᒃ ᐊᒻᒪᓗ ᐃᓄᐃᑦ ᐊᑦᑕᓇᕐᑐᒦᙱᓂᖏᓐᓂᒃ ᑕᒫᓂ ᓄᓇᒥ, ᓯᕗᕐᖏᓂᓐᓂᖅ ᐱᓂᕐᓘᑎᓂᒃ ᐊᒻᒪᓗ ᓯᖁᒥᑦᓯᒍᑎᓂᒃ ᐱᖁᔮᐱᖏᓐᓂᒃ ᑲᕙᒫᐱᒃᑯᑦ, ᒪᓕᒐᖏᓐᓂᓗ ᓄᓇᓕᓕᒫᑦ ᑲᕙᒪᖓᑕ ᐊᒻᒪᓗ ᐱᖁᔭᖏᓐᓂᒃ ᑯᐸᐃᒃᑯᑦ ᐊᒻᒪᓗ ᓴᐅᑦᓯᑐᕐᐸᓂᖅ ᐱᓂᕐᓗᓯᒪᔪᑦ ᓇᐅᖑᓂᖏᓐᓂᒃ."
ᑕᒪᓐᓇᐅᑎᓪᓗᒍ, KRPF-ᑯᑦ ᐊᑐᓲᖑᕗᑦ ᓄᐃᓯᔪᒥᒃ ᐱᓇᓱᐊᑦᓴᐅᑉ ᐅᖃᕐᓯᒪᐅᑎᖓᓂᒃ ᑐᑭᒧᐊᒍᑕᐅᑎᑦᓱᒍ ᐊᑦᑐᐊᓂᕐᒥᓄᑦ ᓄᓇᓕᓐᓂᒃ ᐱᑦᔪᔨᔭᒥᓂᒃ:
- ᒪᑭᑕᑦᓯᓂᖅ ᑐᑭᖏᓐᓂᒃ ᑳᓇᑕᒥᐅᑦ ᐱᖁᔭᕐᔪᐊᖓᓄᑦ ᐃᓄᐃᑦ ᐱᔪᓐᓇᓂᖏᓐᓄᑦ ᐊᒻᒪᓗ ᐃᓱᒪᒥᒍᓐᓇᓂᖏᓐᓄᑦ ᐊᒻᒪᓗ ᑯᐸᐃᒃᑯᑦ ᐱᖁᔭᕐᔪᐊᖓᓄᑦ ᐃᓄᐃᑦ ᐱᔪᓐᓇᓂᖏᓐᓄᑦ ᐊᒻᒪᓗ ᐃᓱᒪᒥᒍᓐᓇᓂᖏᓐᓄᑦ.
- ᓄᐃᑕᑦᓯᓂᖅ ᐱᓇᓱᑦᑎᓯᐊᑦ ᐱᑦᔪᔨᓂᖏᓐᓂᒃ.
- ᓱᕐᖁᐃᑐᓕᐅᕐᓂᖅ ᖁᑦᓴᓚᓐᓇᖏᓐᓂᒥᒃ ᐊᒻᒪᓗ ᐃᓪᓗᐃᓈᓃᙱᓂᕐᒥᒃ ᑲᔪᓯᑎᑦᓯᓂᒃᑯᑦ ᐳᓖᓰᑦ ᐱᑦᔪᔨᒍᑎᖏᓐᓂᒃ.
- ᐱᓇᓱᖃᑎᖃᕐᓂᖅ ᐊᑐᓂ ᓄᓇᓕᒻᒥᒃ ᐊᒻᒪᓗ ᓄᓇᓕᓐᓂ ᓄᓇᓕᓕᒫᓂᓗ ᑎᒥᓂᒃ ᓯᕗᕐᖏᓂᓐᓂᒥᒃ ᐊᒻᒪᓗ ᐋᕐᕿᑎᑦᓯᓂᕐᒥᒃ ᐱᓇᐃᓗᑕᕐᓂᒃ ᓱᕐᕋᐃᔪᓂᒃ ᐊᑦᑕᓇᕐᑐᖃᙱᓂᕐᒥᒃ ᐊᒻᒪᓗ ᐃᓅᓯᐅᑉ ᐱᐅᓂᖓᓂᒃ.
- ᐱᓂᐊᕐᓂᖅ ᐊᕐᖁᑎᖃᕐᓗᓂ ᑳᓇᑕᒥᐅᑦ ᐃᕐᖃᑐᐃᔨᖃᕈᑎᖏᓐᓂᒃ ᐋᕐᕿᓱᐃᒍᑎᒋᓗᒋᑦ ᓄᓇᓖᑦ ᐱᓇᐃᓗᑕᖏᓐᓂᒃ.
- ᑲᐃᓪᓗᑐᕐᓂᖅ ᓴᓇᑐᔪᒥᒃ ᐊᒻᒪᓗ ᐃᑉᐱᒍᓱᑦᓯᐊᑐᒥᒃ ᐃᓂᒥᒃ ᑕᒡᒐᓂ ᐃᓘᓐᓇᑎᒃ KRPF-ᑯᑦ ᐳᓖᓯᓕᒫᖏᑦ ᒪᓂᔨᒍᓐᓇᑎᓪᓗᒋᑦ ᓄᓇᓕᒻᒧᑦ-ᑐᙵᓂᓕᓐᓂᒃ ᐳᓖᓰᑦ ᐱᑦᔪᔨᒍᑎᖏᓐᓂᒃ.
